Gorenak 10 egun eman dizkio Espainiako Gobernuari, Kanarietako 1.000 adingabe migratzaileren ardura har dezan

Kanarietan dauden migratzaile adingabeen auzian, Auzitegi Gorenak 10 eguneko epea eman dio Espainiako Gobernuari 1.000 adin txikikoren ardura har dezan. Zehazki, asiloa eskatu duten edo eskatzeko asmoa dutenei nazioarteko babes sistemara sarbidea diezaien galdegin dio.

Auzitegi Goreneko Administrazioarekiko auzien salak Kanarietako Gobernuak eskatutako kautelazko neurria aintzat hartu du. Horren esanetan, "ezinbesteko" neurria da adin txikiko horiek "pilaketa" egoeran bizi direlako, eta haien babesa bermatu behar da.

Magistratuek azaldu dutenez, gaur-gaurkoz, bidaiderik gabeko adin txikiko migratzaile horiek Kanarietako Gobernuaren ardurapean daude. Ildo horretan, administrazioarekiko auzien salak nabarmendu du asilo eskatzaileek gizarte-laguntza espezifikoak jasotzeko eskubidea dutela.

Bestalde, hamar egun horietan hartutako neurrien berri emateko agindu dio Auzitegi Gorenak Pedro Sanchez buru duen koalizio gobernuari. Behin epe hori igarota, ahozko saioa egin ala ez erabakiko du, kautelazko neurriak bete diren ikusteko.