Gizartea -
NAFARROA
Tuterako eta Ribaforadako bi nekazari hil omen zituen gizona atxilotu dute Frantzian
Ribaforadan eta Tuteran bi gizonezko hil zituzten arma zuriz 2023ko urte amaieran, eta Lleidan beste bat hil zuten, antzera, urtarrilaren hasieran. Hilketa horien egilea delakoan gizon bat atxilotu du Frantziako Poliziak, Beziers udalerrian.
AGENTZIAK | EITB Media
Nafarroan bi nekazari eta Lleidan hirugarren bat hil omen zituen gizona atxilotu du Frantziako Poliziak.
Ikerketaren gertuko iturrien arabera, pasa den asteartean atxilotu zuten Beziers udalerrian, urtebete inguru iraun duen Espainiako Poliziaren, Guardia Zibilaren eta Esquadra Mossoen ikerketaren ondotik.
Tuteran eta Ribaforadan bi pertsona hil zituzten arma zuriz 2023ko azaroaren 22an eta abenduaren 21ean, hurrenez hurren, eta Lleidako Vilanova de la Barca herrian beste gizon bat hil zuten, antzera, 2024ko urtarrilean.
Hiru hilketek elkarren antza daukate: nekazaritza-eremuetan egin ziren, hildakoek 68 urtetik gora zituzten eta arma zuriz edo nekazaritzako tresnekin egin zituzten hilketak. Dena dela, Lleidako Vilanova de la Barca udalerrian Ribaforadako bizilagunaren autoa aurkitu izanak eraman zituen ikertzaileak hiltzailea pertsona bakar bat zela pentsatzera.
Ustezko hiltzaileak hirugarren biktimaren autoan ihes egin zuten Kataluniatik Frantziara. Geroztik haren bila aritu dira, harik eta pasa den urtarrilean Frantziako Poliziak Beziers udalerrian aurkitu zuen arte.
Kasuaren gertuko iturrien arabera, atxilotuak (Marokon jaioa) aurrekariak ditu jihadismoagatik, eta aurrez bi urte eta erdiko kartzela zigorra ezarri zioten Estatu Islamikoarekin Sirian borrokatu nahi izateagatik.