Gizartea -
Indarkeriazko lapurreta
Adingabe bat arma zuriz zauritu dute izterrean Gasteizko parke batean lapurreta egin diotenean
Zauritua beste adingabe batekin zegoen parkean lapurreta egin zietenean, eta Txagorritxuko ospitalera eraman zuten artatzera. Ertzaintzak ikerketa abiatu du erasoaren egileak identifikatzeko.
Agentziak | EITB Media
Adin txikiko bat arma zuriz zauritu dute izterrean aste honetan Gasteizen, Arriaga parkean lapurreta egin diotenean, eta Ertzaintzak ikerketa abiatu du gertakariak argitu eta egileak identifikatzeko.
Segurtasun Sailak aditzera eman duenez, indarkeriazko lapurreta ostegunean gertatu zen, 21:00ak inguruan.
Zauritua eta horren lagun bat, hori ere adingabea, parkean zeudela, lapurreta egin zieten, eta bietako bat zauritu zuten. Txagorritxuko ospitalera eraman zuten artatzera.
Bi adingabeek salaketa jarri zuten ertzain-etxe batean, eta, horren aurrean, Ertzaintzak ikerketa abiatu zuen, lapurretaren eta erasoaren egileak identifikatu eta atxilotzeko.