Gizartea -
BIZKAIA
Emakume bat hil da eta gizon bat larri zauritu da Bilboko Labayru kalean izandako sutean
Su hartu duen etxebizitzako egoiliarrak dira biak. Beste hamar pertsona artatu behar izan dituzte kea arnasteagatik, eta zazpi ospitaleetara eraman dituzte. 08:02an jaso dute abisua larrialdi zerbitzuek, eta badirudi sua bigarren solairura iritsi dela.
eitb media
Emakume bat hil da eta gizonezko bat larri zauritu da Bilboko Labayru kaleko etxebizitza batean izan den sutean.
Sutea aipatu kaleko 28.ean piztu da, lehenengo solairuko etxebizitza batean, eta bertako egoiliarrak dira hildako emakumea eta larri zauritutako gizonezkoa, 73 eta 78 urtekoak. Horiez gain, beste hamar pertsona artatu dituzte kea arnasteagatik, eta horietako zazpi ospitaleetara eraman behar izan dituzte.
Suhiltzaileak ez ezik, anbulantziak, Ertzaintza eta Udaltzaingoa ere bertaratu dira.
Sutearen abisua 08:02ean jaso dute larrialdi zerbitzuetan, eta ketza handia zabaldu badare ere, jada kontrolpean dute. Gainera, badirudi garrak bigarren solairura ere iritsi direla, eta eraikina jendez hustu behar izan dute.
Dena den, Juan Maria Aburto Bilboko alkateak esan du eraikinaren egitura ondo dagoela. Hala, teknikarien oniritzia jaso ostean, bizilagunak etxera itzuli ahal izan dira, sutea gertatu den etxebizitzakoak eta gainekoak izan ezik.
Ertzaintzak ikerketa abiatuko du sutea zerk eragin duen argitzeko.
