Gizartea -
IKUSKATZEA
375 kilo arrain egoera osasungaitzean zeramatzan ibilgailu bat geldiarazi dute Ondarroan
Eusko Jaurlaritzako Arrantza Ikuskaritzako Zerbitzuak bere gain hartu du atzemandako materiala, eta zehapen-espedientea ireki die bi pertsonari.
Agentziak | EITB MEDIA
Igande goizean, Arrantza Ikuskaritzak Ertzaintzari jakitera eman zion ibilgailu batean lonjan egon gabeko arrainak zeramatzatela.
Ondarroako ertzain-etxeko agenteek bi gizon zihoazen ibilgailua aurkitzea lortu zuten. Identifikatu ondoren, egiaztatu zuten maletategian hainbat motatako 137 kilogramo arrain zeramatzatela, plastikozko poltsatan sartuta eta osasunaren kalterako egoeran.
Miatzen jarraitu zuten, eta arrainez betetako zabor-poltsa gehiago aurkitu zituzten, 238 kilo inguru: guztira, 375 kilo. Berez, marinelentzako partida izan behar zuen, baina partikular batek erosi zuen kalean saltzeko, baina pisatu gabe eta lonjara eraman gabe. Gainera, indarrean dauden trazabilitatearen gaineko legeek eskatzen duten dokumentaziorik gabe.
Horregatik guztiagatik, Arrantza Ikuskaritzako teknikariek hartu zuten aurkitutako arrainen kudeaketa bere gain, eta, beharrezko frogak egiteaz gainera, zehapen-espediente bat ireki zien gizonei, elikagaien segurtasunaren arloko araudia ez betetzeagatik.