Herri kirolen entrenamendu profesionaleko lehen zentroa irekiko dute Bilboko Txurdinaga auzoan

Juan Mari Aburto Bilboko alkateak eta Leixuri Arrizabalaga Bizkaiko Foru Aldundiko Euskara, Kultura eta Kirol Saileko diputatuak Bilboko Herri Kirol Zentroa proiektua aurkeztu dute ostiral honetan. Euskal Autonomia Erkidegoko (EAE) herri kirolen entrenamendu profesionaleko lehenbiziko zentroa izango da, eta Txurdinagako udal kiroldegian egongo da.

Bilboko Udalak 1.367.621,50 euroko aurrekontua du proiektua gauzatzeko, eta Bizkaiko Foru Aldundiak 229.675 euroko laguntza eman dio. Lanak udaberriaren amaieran hasiko dituzte. Diziplina anitzeko pabiloi berria Txurdinagako udal kiroldegiko lursailetan egongo da kokatuta, eta Bilboko Txirrika Herri Kirol Klubak kudeatuko du.

Kirol ekipamenduak 846 metro koadroko azalera izango du, eta erabilera anitzeko pista batek, komun eta aldagela egokituek, fisioterapia gela batek, harrera bulegoak eta gela teknikoek osatuko dute. Gainera, Txurdinagako udal kiroldegirako oinezkoentzako sarbide bat eta ibilgailuentzako beste bat izango ditu.

Aburtok azaldu duenez, "Bilboko Herri Kirol Zentroaren helburua da herri kirolak garatzeko eta profesionalizatzeko erreferentziazko zentroa izatea".

Gainera, nabarmendu du Bilboko Udalak "gure herrialdeko eta hiriko kirol estrategikoekin duen konpromisoa" indartuko duela; "izan ere, kirol horiek gure ohitura eta tradizioei lotuta daude, eta gure aberastasun kulturalaren eta euskal nortasunaren parte dira".Erabilera anitzeko pistan pabiloi zabal bat egongo da, hormarik gabea, eta hainbat kirol jarduera egiteko aukera emango du, hala nola harri jasotzea, sokatira, trontzak, aizkora, lasto jasotzea, lasto botatzea, ingude jasotzea, txinga eroatea, zaku eramatea, orga jokoak eta lokotx bilketa.