Gizartea -
Gertakaria
Pertsona batek beste bat labankatu du Bilboko metroan
Erasoa 07:00etan izan da Abandoko metro geltokian. Biktimak zauri arinak ditu, eta sendagiria eman diote jada. Ertzaintzak ustezko erasotzailea atxilotu du.
EITB MEDIA
Ertzaintzak 19 urteko pertsona bat atxilotu du astelehen goizean Bilbon, Abandoko geltokian beste pertsona bati arma zuriz eraso egitea egotzita. Biktima ospitalera eraman behar izan duten arren, dagoeneko sendagiria eman diotela jakinarazi du Eusko Jaurlaritzako Segurtasun Sailak.
07:00ak aldera, Metro Bilbaotik deia jaso du Ertzaintzak, Abandoko geltokian pertsona talde bat borrokan ari zela ohartarazteko. Agenteak bertaratu direnean, gazte bat zaurituta aurkitu dute. Sorbalda aldean labankatu du ustezko erasotzaileak, eta Basurtuko Ospitalera eraman dute.
Handik gutxira, erasoaren ustezko egilea atxilotu, eta ertzain-etxera eraman dute. Gainera, hainbat pertsona identifikatu dituzte, gertakarien lekuko gisa, eta ikerketa abiatu dute.