100.000 jarraitzaile baino gehiago dituzten influencerrak behartuta egongo dira albiste faltsuak gezurtatzera

Zuzenketa Eskubidea Arautzen duen Lege Organikoaren aurreproiektua gaur onartu du Ministroen KontseiluaK, eta sare sozialen erabiltzaile garrantzitsuez (influencer) hitz egiten du, hau da, sare sozial batean 100.000 jarraitzaile baino gehiago dituztenez edo plataforma eta sare sozial guztiak batuta 200.000 baino gehiago dituztenez.

"Pertsona horiek hedapen handiagoa dute komunikabide tradizional askok baino zabaltzen duten informazioetan. Eta badira buloaren eta gezurraren profesionalak, egunero gure eztabaida publikoa gezurrekin eta faltsukeriekin estaltzen dutenak. Haien aurka ere egin ahal izango dute gezurren edo zehaztasun faltaren batek eragiten diela uste duten herritarrek", zehaztu du Felix Bolaños Justizia ministroak.

Ministroen Kontseiluak aurreproiektua onartu du, 1984ko araua erabat ordezkatzen duena. Neurria 'Demokraziaren aldeko Ekintza Egitasmoan' jasota zegoen. Buloek kaltetutako herritarrei eskubide hori bermatzea da helburua, eta, lehen aldiz, influencer delakoak barne hartzen ditu.

Justizia Ministerioko arduradunak azaldu ditu araudi berri honen xehetasunak. "Eztabaida publikoan kalitate handiagoa bultzatu nahi dugu. Gure herritarren zuzenketarako eskubidea erraztu eta bermatu nahi dugu, baldin eta informazio faltsua, zehaztugabea eta gezurra bada", azpimarratu du, eta gaineratu du arauaren bidez "zuzenketaren inguruabarrak egokitu egingo direla ingurune digital batera", hau da, gaur egungora, eta "guztiak azkartuko" direla.

Zehazki, Bolañosek zehaztu duenez, lege berriak jasotzen dituen bi berrikuntza "giltzarriak" hauek dira: informazio eta komunikazio modu berriak jasotzen ditu, eta, bigarrenik, "aldaketak egiten ditu, albiste faltsu edo zehaztugabe baten eraginpean dauden herritarrek zuzentzeko duten eskubidea errazteko".

Aurreproiektuak dituen berrikuntza garrantzitsuenen artean ere, Bolañosek nabarmendu du zuzenketa eskatzeko epea 7 egunetik 10 egunera luzatzen dela.

Bolañosen ahotan, araua "ona izango da, halaber, komunikabideen jokabide egokiak nagusitzeko, egunerokoan maizegi gertakariak, zehaztasunik gabe edo zuzenean faltsuak diren informazioak argitaratzen dituzten beste batzuetara zabaltzeko".