Albiste izango dira: Trafiko eskumena Nafarroara, EHUko hauteskunde eztabaida eitb.eus-en eta zerga erreforma

Honako gai hauek hartuko dituzte gaur, 2024ko azaroaren 21ean, hedabideetako lerroburu nagusiak:

- Trafiko eskumena Nafarroara: Diputatuen Kongresuak behin betiko onartuko du Nafarroako Foru Hobekuntzaren Legean trafiko eskumena sartzeko Espainiako eta Nafarroako gobernuek adostutako akordioa jasotzen duen lege proiektua, PPk eta Vox eskuin muturreko alderdiak Senatuan ezarritako betoa bertan behera utziz. Espainiako Gorteetan azken urratsa egin ondoren, Estatuko Aldizkari Ofizialera (BOE) bidaliko da.

- EHUko hauteskunde eztabaida eitb.eus-en: Eva Ferreira (Matematika Aplikatuan katedraduna) eta Joxerramon Bengoetxea (Zuzenbidearen Filosofian katedraduna)  EHUko errektoregaien arteko bigarren eta azken hauteskunde eztabaida egingo da, 18:00etatik aurrera, Radio Euskadiko estudioetan, Xabier Garcia Ramsden kazetariaren gidaritzapean. Eztabaida saioa zuzenean jarraitu ahal izango da, eitb.eus atarian.

- Erreforma fiskala: Europar Batasunak multinazionalei ezartzen dien zergaren legea, Espainiako Gobernuak iragarritako pakete fiskalaren zati bat gehituta, ostegun honetan iritsiko da Kongresuan egingo dituen azken bozketetara. Hainbat xehetasun zehaztugabe daude oraindik, eta Podemosek kontrako botoa eman dezake, proiektua bertan behera utziz.