Gizon bat atxilotu dute Bartzelonan, 2022an Irungo emakume bat hil eta haren gorpua ezkutatzea egotzita

Mossos d'Esquadrak 53 urteko gizon bat atxilotu du Bartzelonan, 2022an emaztea hiltzea eta haren gorputza ezkutatzea egotzita. Emakumea Irungoa zen izatez, baina La Morera de Montsant herrian (Tarragona) bizi zen hil zutenean; oraindik ezin izan dute haren gorpua aurkitu.

Gizona fidantzarik gabe espetxeratu dute asteazken honetan Vallsen (Tarragona), emakumearen aurkako indarkeriaren 1 zenbakiko epaitegiaren aginduz. Kataluniako Justizia Auzitegi Nagusiak zehaztu duenez, hilketa, gorpua ezkutatzea eta tratu txar fisiko eta psikologikoak egotzi dizkiote gizonari.

Mossoek ohar batean azpimarratu dutenez, gizona krimenean inplikatu ahal izateko, emakumea desagertu ondoren ikerketa sakon bat egin ondoren, telefonia mugikorreko datuak funtsezkoak izan dira haren koartada desmuntatzeko, baita emakumea desagertu eta hilabete batzuetara oraindik haren gauzak izatea ere, biktimak ez baitzituen abandonatuko normaltasun testuinguru batean.

Ikerketa 2022ko abuztuaren 12an abiatu zuten, biktimaren senideek emakumearen desagerpena salatu ostean.

Mossoen Desagertutako Pertsonen Unitate Zentralak bere gain hartu zuen ikerketa, desagerpena krimen baten atzean egon zitekeela zioten zantzuen aurrean.

Mossoek ikerketa zabalik dute, eta orain biktimaren gorpua aurkitzeko informazio gehiago lortzen saiatzen ari dira.