Bilboko ikastetxe bat zigortu dute bullying kasu baten aurrean ezer ez egiteagatik

Bilboko epaile batek Santutxu auzoan dagoen Karitate Alabak Begoñako Andramari Ikastetxea zigortu du bullying kasu baten aurrean ezer ez egiteagatik. Biktima bost urteko neskato bat da, eta ikastetxeak 40.000 euroko kalte-ordaina beharko dio familiari.

Epai aitzindaria da biktimaren adinagatik, ikastetxeak erantzukizun zuzena izan duelako, eta kalte-ordaina orain arteko handiena delako.

Biktimaren gurasoak arin konturatu ziren zeozer arraroa gertatzen zitzaiola alabari. Ikastetxearekin hainbat bider hitz egin ostean, azkenean Eusko Jaurlaritzaren Hezkuntza Sailera joan ziren, eta bullying protokoloa martxan ipini zuten, baina ez zuten ezer atzeman. Abokatuaren esanetan, erabakia berandu heldu zelako.

Epaiak argi esaten du ikastetxeak "ikusle jarrera" hartu zuela, eta bere neurriak, "eraginkortasunik gabekoak" izan zirela.

Biktimaren familia pozik dago epaiarekin. Gurasoek ez dute nahi beste inork halakorik sufritzea. Hala ere, aldeek sententziari helegitea jartzeko aukera dute Bizkaiko Lurralde Auzitegiaren aurrean.