Bilbon bost lagun hiltzeagatik auzipetutako gizona iruzurragatik epaituko dute astelehenean

Gehitu Euskal Herriko Lesbiana, Gay, Trans, Bisexual eta Intersexualen elkarteak, Euskal LGBTI Behatokiak eta akusazio partikularrak eskatu dute atzera dezatela Bilbon bost lagun hiltzea egotzita auzipetutako gizonaren aurkako biharko ahozko epaiketa. Kasu honetan, baina, iruzurragatik epaituko dute gizon bat hiltzen saiatzea egotzita zigortu zuten akusatua.

Ohar baten bidez, Auzitegi Konstituzionalaren erabakia jakin arte ez dezatela epaiketarik egin eskatu dute.

Auzipetuari 10 urteko espetxe zigorra ezarri zion EAEko Justizia Auzitegi Nagusiak, hilketa saiakera egotzita. Gainera, zabalik du oraindik bost gizonen hilketekin lotuta abiatutako auzia. Biharkoan, dena den, iruzur delitu batengatik epaitzekoak dira.

Kasu horretan ere, hilketagatik ikertu zuten, baina behin-behinean artxibatu egin zuten auzia, eta Gehituk eta Euskal LGTBI Behatokiak helegitea jarri zuten erabaki horren aurrean.

Herri akusazio gisa, Gehituk asteleheneko epaiketari buruz esan du zentzugabea dela, "ekonomia prozesala" tarteko, eta "ez duelako errespetatzen bigarren biktimizazio bat dakarten alferrikako tramiteak gutxitzea exijitzen duen araua".

Bestalde, ohartarazi du ondarearen kontrako delituak oinarrian dituen epaiketak biktimak berriro biktimizatzea hauspotuko duela.