Uholdeak Gipuzkoan eta Ipar Euskal Herrian, azken orduetako euri-jasen ondorioz

Urak gainezka egin du Euskal Herriko hainbat puntutan, batez ere kostaldean eta gehienbat Bidasoa inguruan atera da ura bere bidetik. Txingudi ikastolaren inguruan, adibidez, hainbat auto urpean gelditu dira, eta kalte gehiago ere eragin ditu urak. Oria ibaiaren kasuan, hainbat lekutan maila horia hartu du ibaiak, eta oro har, ur-putzu handiak Euskal Herriaren ipar-ekialdeko eremu ugaritan sortu dira.

Eusko Jaurlaritzak Larrialdietarako Plan Berezia aktibatu du Gipuzkoan, ibaien arroen egoeragatik eta lurralde horretan euri gehiago espero delako. Azken 12 orduan 60 eta 100 l/m2 artean pilatu dira, batez ere Gipuzkoan eta Ipar Euskal Herrian.

Eusko Jaurlaritzako Segurtasun Sailak jakitera eman duenez, alerta laranja ezarri dute Gipuzkoako ipar-ekialdean prezipitazio iraunkorragatik ostegun honetako gauerdira arte, eta abisu horia gainerako lurraldeetan.

Halaber, alerta horia 16:00etatik 18:00etara egongo da indarrean, itsasaldeko arriskuagatik, eta 05:00etatik 07:00etara, arrazoi beragatik.

Kezka handiena Bidasoaren arroan dago, han izan baitira lehen uholdeak. Hondarribiko Jaizubia estazioa alerta laranjan dago, baina 13:30etik 15:00etara gorrian egon da.

Oria eta Urola ibaien egoera ere arreta bereziz jarraitzen ari dira, Amundarain eta Matxinbentako estazioak alerta horian baitaude. Donostian, gainera, urteko prezipitazio marka hautsi da. Irunen, Udalak dagoeneko neurriak hartu ditu arratsaldeko itsasgoraren arriskua dela eta.

Gipuzkoan botatzen ari den euriaren ondorioz, Añarbeko urtegiak segundoko 53 metro kubiko husteari ekin dio ostegun honetan, eta egunean zehar jarraituko du, nahiz eta Urumearen mailaren arabera alda daitekeen.

Ipar Euskal Herrian, Lapurdi zein Nafarroako Behereko gune batzuetan ere urak gainezka egin du, eta ikusteko datozen orduetan zein den egoeraren bilakaera. Horrela, Errobi ibaiak gainezka egin du Baionan. Ondorioz, ibai bazterreko kaiak itxi dituzte.

Ipar Euskal Herrian ere alerta laranja indarrean jarri du Pirinio Atlantikoetako Prefeturak uholde arriskuagatik, eta ondoren bihar goizeko 10:00ak arte luzatu du.

Nafarroan, Foru Erkidegoko iparraldean bota du euri gehien aste honetan, gaur, bereziki, hainbat puntutan metro koadroko 55 litro baino gehiago pilatu baitira.

Irabia (61,8 litro), Iñarbegi (55,3 litro), Gorramendi (52,7 litro) eta Erremendian (51,6 litro) bota du gehien. Iruñean metro karratuko 15 litro pilatu dira. Hala ere, azken 24 orduetako errekorra Gorramendik du, 104 litro pilatuta.

Atzotik, 5.737 tximistargi izan dira Euskal Herrian. Ekaitzek zenbait arazo eragin zituzten Aiaraldean (Araba).