Gizartea -
NAFARROA
23 pertsona intoxikatu dira Iruñeko 'The Champions Burger' ekitaldian hanburgesak janda
Irailaren 19tik 29ra Iruñean antolatu den 'The Champions Burger' ekitaldian, Espainiako Estatuko gourmet hanburgesa onenaren bila aritu dira. Aurrez, ekimenak geldialdiak egin ditu beste hainbat hiritan, Donostian eta Barakaldon kasu.
EITB Media
23 pertsona intoxikatu dira Iruñeko 'The Champions Burger' ekitaldian hanburgesak janda, eta horietako bi ospitaleratu behar izan dituzte, EITB Mediak baieztatu duenez.
Nafarroako Gobernuko Osasun Departamentuak jakinarazi duenez, urriko lehen astean E. coli verotoxigenikoa (VTEC) bakterioaren gorakada atzeman zuten. Kasuak ikertu ondoren egiaztatu zutenez, pertsona horietako 23k Iruñeko 'The Champins Burger' ekitaldian jan zuten.
23 pertsona horietatik bi ospitaleratu behar izan zituzten, baina dagoeneko sendagiria jaso dute. Intoxikazioak ez dira larriak izan, eta kaltetutako pertsonak gazteak dira kasu guztietan.
Azkenik, Osasun Departamentuaren arabera, azken egunetan ez da kasu gehiagorik hauteman.
Irailaren 19tik 29ra Iruñeko Runa parkean egin zen 'The Champions Burger' ekitaldian Espainiako Estatuko gourmet hanburgesa onenaren bila aritu dira. Guztira, 150.000 pertsonak parte hartu dute. Aurrez, ekimenak geldialdiak egin ditu beste hainbat hiritan, Donostian eta Barakaldon kasu.
'The Champions Burger' ekimenaren antolatzaileak esan du osasun kontrol guztiak betetzen dituela
Intoxikazioaren berri izan ondotik, osasun kontrol guztiak eta elikagaiekin lanean aritzeko segurtasun arauak betetzen dituela esan du 'The Champions Burger' ekimenaren antolatzaileak.
Ohar baten bidez azaldu duenez, ez du osasun agintarien aldetik inongo komunikazio ofizialik jaso.
"'The Champions Burger' tourraren baitan agintariek gure instalazioetan egin dituzten ikuskapenek baieztatu dute indarrean dagoen araudia betetzen dugula", nabarmendu du enpresa antolatzaileak ohar baten bidez.