Gizartea -
indarkeria futbolean
Anderlecht taldeko ultrek barkamena eskatu dute, Reale Arenan eragindako txikizioagatik
Mauves Army 2003 Belgikako taldearen zale erradikalek oharra kaleratu dute, ostegunean Donostian gertatutakoengatik barkamena eskatzeko. "Ez dago aitzakiarik", aitortu dute, "ergelkeria gailendu zen, arrazoiaren kaltetan".
EITB Media
Joan den ostegunean, Realaren kontrako Europa Ligako partidan, Donostiako estadioan eragindako istiluengatik "barkamen zintzoa" eskatu dute Anderlecht taldeko ultrek. Belgikako taldearen zaleetako batzuek egindako txikizioa "irmo gaitzetsi" dute eta "taldearen etorkizuna bermatzeko beharrezkoak diren neurriak" hartuko dituztela iragarri.
Mauves Army 2003 du izena ultren taldeak, eta bere sare sozialetan zabaldu du barkamen adierazpena. Taldeko bost kide atxilotu zituen Ertzaintzak, desordena publikoak eta agintaritzaren kontrako atentatua egotzita. Zale erradikalek metakrilatozko babes hesia apurtu, eta aulkiak eta objektuak bota zituzten azpian zeuden harmailetara.
"Joan den ostegunean talde gisa kale egin genuen gure kide batzuen jarrera kontrolatzeko garaian (...) kontrola galdu genuen. Ergelkeria gailendu zen, arrazoiaren kaltetan", dakar adierazpenak. Onartu dutenez, "ez dago aitzakiarik" eta "egindakoa aitortzea" besterik ez dutela azpimarratu dute.
"Guk geuk sortu dugun ekaitzari aurre egin beharko diogu, eta denbora beharko dugu egindako akatsak zuzentzeko", gaineratu dute. Hala, iragarri dute "taldearen etorkizuna bermatzeko beharrezkoak diren neurriak" hartuko dituztela.