Emisio gutxiko eremuak: Noiz sartuko dira indarrean gainerako euskal hiriburuetan?

Bilbo izan da Hego Euskal Herriko lehenengo hiriburua, ingurumen bereizgarriak kontutan hartuz, emisio gutxiko eremua martxan jartzen eta gehien kutsatzen duten ibilgailuei kale horietara sarrera mugatzen, baita baimenik gabe sartzen direnak zigortzen ere.

Hego Euskal Herriko gainerako hiriburuak ere EGEak arautuko dituzten araudi berriak lantzen ari dira, eta gehienak datorren urtearen hasieran sartuko dira indarrean.

Donostia

Gipuzkoako hiriburuko Udalak 2025 urtearen hasieran isuri gutxiko araudi berria onartuko duela aurreikusten du. Une horretatik aurrera, zenbait gunetan ibilgailu batzuk sartzeko debekuak eta murrizketak hasiko dira.

Donostiako EGEak Alde Zaharra eta hiriaren erdigunea hartuko ditu, 1,2 kilometro karratuko zabalera izango du eta oinez 20 minutuan egiten da. Araudia bi etapatan jarriko da indarrean:

- 2025ean ibilgailu zaharrenei, etiketarik ez dutenei edo A kategoriakoak deitzen zaienei, sarrera debekatuko zaie.

- 2028tik 2030era bitartean, B bereizgarria dutenei ere debekatuko zaie sarrera gune horretara.

Agintariek aurreratu dutenez, murrizketa hauek salbuespen batzuk izango ditu, baina, era berean, zigorrak egongo direla ere jakinarazi dute. 200 eurorainokoak izango dira eta % 30eko igoera izango dute debekatutako gunean berriz ere sartzen direnentzat.

Gasteiz

Gasteizko Udalak ere 2025ean ezarri nahi du emisio gutxiko eremua eta kasu horretan ere, bi fasetan sartuko da indarrean:

- 2027ra arte, ez dira kontuan hartuko ingurumen-bereizgarriak, eta Alde Zaharrera eta zabalguneko gune batera sartzea debekatuko zaie berariaz hara ez doazen ibilgailu guztiei. Kasu horretan, baimen puntualak emango zaizkie egoiliarrei, gremioei eta ibilgailu bereziei.

- 2027tik aurrera, gutxien kutsatzen duten ibilgailuei bakarrik utziko zaie sartzen. Beraz, koloretako eranskailua hartuko dira kontuan.

Hala ere, Udalak oraindik urrats batzuk egin behar ditu, hala nola mugatutako perimetroan jarriko dituen kamerak erosi.

Iruñea

Iruñeko Alde Zaharra emisio gutxiko eremu gisa mugatuta dago gaur egun, baina bertarako sarrera baimentzeko ez dira ingurumen-bereizgarriak kontuan hartzen. Gaur-gaurkoz, egoiliarrak, gremioak eta banatzaileak eta zerbitzuko ibilgailuak bakarrik sar daitezke.

Hala ere, Udala araudi berri bat lantzen ari da bere eremuak mugatzeko eta horietan sartzen diren ibilgailu kutsatzaileentzako zigorrak ezartzeko.