Jaizkibelek normaltasunez desfilatu du konpainia gisa, baina bakarrik utzi dute Gernikako Arbola plazan

Jaizkibeleko kideak konpainia gisa ari dira ospatzen Hondarribiko Alardea lehenengo aldiz, eta goizeko lehenengo desfilea normaltasunez egin dute, plastiko beltzak eta bestelakoak atzean utzita.

Alarde parekidea babesten duen konpainia bakarra lehenengo aldiz joan da Gernikako Arbola plazako elkargunera, konpainiak batzen diren lekura, baina alarde tradizionaleko konpainiek ez joatea erabaki dute, eta bakarrik utzi dituzte Jaizkibel konpainiakoak.

Erabaki horrek 20 minutu atzeratu du alarde tradizionalaren irteera, 08:00etarako aurreikusitakoa.

Jaizkibelek zegokion orduan ekin dio desfileari, Nora Ferreira kapitaina aurrean zela, eta Nahia Salaberria, gurpildun aulkian, kantinera. Aurten mila bat kide elkartu dira bertan, giro onean eta euri txikiari aurre eginez.

Alarde tradizionalaren jarraitzaileek ez bezala, Jaizkibel konpainiakoei harrera egin diete zenbait agintarik, Ibone Bengoetxea lehen lehendakariordeak, Eider Mendoza Gipuzkoako ahaldun nagusiak, Igor Enparan Hondarribiko alkateak eta Manuel Lezertua Arartekoak, besteak beste.

Nora Ferreira Jaizkibel konpainiaren kapitaina gustura agertu da goizeko desfilearekin, eta "oso pozik" daudela esan du, Gernikako Arbola plazara joatea "aurrerapausoa" izan delako. Horren harira, azpimarratu du eurek Udalaren ebazpena onartu eta bete dutela, eta ez dutela arazorik gainerako konpainiekin elkartzeko, horixe baita eurek aldarrikatzen dutena: "Denek batera ospatzea eta desfilatzea". Horregatik, alarde tradizionalekoei egotzi die Gernikako Arbola plazan agertu ez izanaren "ardura".

Ferreiraren hitzetan, "goiz polita" igaro dute, Kale Nagusian gora txaloka jaso dituzte, erakundeen "beroa" sentitu dute, eta eliz atarian udal korporazio guztiak egin diete harrera.

Hala ere, horiek igaro direnean, emakume eta neska batzuk altxatu egin dira eta bizkarra eman diete Jaizkibelekoei.

"Alardea bakarra da, eta ez gaude bertan. Hondarribiar askok babestuko lukete gu hor egotea. Oraindik talde txiki bat badago, botere handiegia duena, ez duena nahi emakumeok parte hartzea, giroa nahasten ari dena eta elkarrizketarako borondaterik ere ez duena", kritikatu du.

Hori horrela, Ferreirak "elkarrizketa" bultzatzearen aldeko apustua berretsi du "hau konpontzeko bide gisa". "Alardea ondare immateriala da, guztiona. Horregatik, Udalak, herritarren ordezkari den heinean, horixe sustatzeko betebeharra du", esan du. "Gaur, beti egin dugun moduan, Hondarribiko gobernu taldea babestu nahi dugu. Elkarrizketa eta irtenbidearen aldeko apustua egin du, eta aitortu egiten diogu egin duen lana eta zilegitasuna, desadostasunak desadostasun", gaineratu du.

Jaizkibel konpainia eta Alarde osoa kalera itzuliko dira arratsaldean, eta gaurko beste berritasunetako bat izango da, Jaizkibelek Kale Nagusia zeharkatuko baitu lehen aldiz 'Zapatero' ekitaldian. Orain arte Gipuzkoa plazan egiten zuen, tradizionaleko jarraitzailerik gabe.