Bilboko Aste Nagusian 1,6 milioi bisitari izan dira aurten eta delituak %14,5 jaitsi dira

Aurten, Bilboko Aste Nagusian 1,6 milioi lagun inguru izan dira, 2023an baino 200.000 gutxiago. Iaz, inoizko bisitari kopuru handiena izan ziren Bilbon: 1,8 milioi pertsona.

"Jai jendetsuak izan dira eta alaitasuna izan da nagusi", adierazi du Juan Maria Aburto alkateak, bi milioi bisitaritara heltzeko helburua lortu ez duten arren, gustura.

Jende gutxiago ibiltzearekin batera, iaz baino delitu gutxiago gertatu dira, % 14,5 gutxiago, zehazki. Hala ere, agenteek 156 atxiloketa egin dituzte.

Alkateak Udaltzaingoaren eta Ertzaintzaren arteko koordinazioa goraipatu du, jarduera "azkarra eta eraginkorra" izan dutela nabarmenduz, eta eraso matxista, arrazista edo homofoboen kasu larririk ez dela izan aipatu du komunikabideen aurrean egindako balorazioan.

Ekitaldirik jendetsuenak balearen desfilea, txikigunea -120.000 lagun- eta su artifizialak izan dira, besteak beste. Suek, gauero, batez beste 110.000 pertsona erakarri dituzte, eta, azken egunetan, 130.000 lagun baino gehiago.

Era berean, 220.000 lagun izan dira kontzertuetan: 8.500 Izarorenera, eta 7.000 La Love You taldearenera, esaterako.

Udalak jakinarazi duenez, gainera, 50.000 pertsona inguru bildu ziren Arriaga plazan eta inguruan, Aste Nagusiari ongietorria emateko, Marijaia, Pregoilaria eta Txupinera ikusteko. Aurten, Itziar Ituño aktorea eta Nagore Ugarte, Txinbotarrak konpartsera, izan dira, hurrenez hurren.

Amaitzeko, alkateak herritarrak zoriondu nahi izan ditu eta adierazi du berehala hasiko direla datorren urteko jaiak prestatzen.