Gizartea -
Trafikoa
10 kilometroko auto ilarak Irunen Baionarantz, oporren itzulera operazio betean
AP-8an, Irunen, Baionako noranzkoan, 10 kilometrokoak ziren ilarak 20:30ean, eta Gi-636 errepidean ere izan dute eraginik. Oinaurreko irteera itxi egin dute Irungo erdigunea kolapsatu ez dadin. Zarautzen ere badira auto-ilarak, baina txikiagoak.
EITB Media
Afrika iparraldean nahiz iberiar penintsulan uda igaro eta Europa aldera oporretatik bueltan den jendetzaren ondorioz, auto ilarak sortu dira larunbat arratsaldean Irunen, AP-8an, Baionarantz.
20:30ean ia 10 kilometrokoak ziren ilarak, eta ia Oiartzun pareraino iristen ziren. Egoera are gehiago zaildu du arratsalde erdi aldera gertatu den eguraldi aldaketak eta euriak.
Ilarak sortzen ari zirela ikusita, 16:00etan, Oinaurreko irteera (Irun) itxi dute, jendea Irundik desbideratu eta hiriaren erdigunea kolapsatzea saihesteko.
Gi-636an ere sumatu da AP-8ko pilaketen eragina, Baionako noranzkoan.
Zarautzen, AP-8an, Baionarantz, 2 kilometro inguruko ilarak izan dira.