Gizartea -
MENDI-ISTRIPUA
Datorren aste hasieran aberriratuko dituzte Mont Blancen hildako bi euskal mendizaleen gorpuak
Beharrezko izapideak amaituta, astelehenean edo asteartean helduko dira hilotzak Euskal Herrira. Istripuan zauritu zen hirugarren euskalduna etxean da jada.
EITB MEDIA
EITB Mediak jakin duenez, datorren aste hasieran iritsiko dira Mont Blancen hildako bi mendizale gipuzkoarren gorpuak etxera.
Beharrezko izapideak amaituta, hilotzak lehenbailehen ekartzeko itxaropena dute ingurukoek.
Mikel Etxezarraga Usurbilen jaio baina Lezon bizi zen 26 urteko mendizaleak eta Markel Galdos 27 urteko oiartzuarrak istripua izan zuten asteazkenean Mont Blanc du Tacul menditik jaisten ari zirela.
Beraiekin zihoan lagun batek ikusi zuen istripua, eta hark eman zuen abisua. Arin zauritu zen mendizale hori, eta alta jasota, Euskal Herrian dago jada.
Doluminak ematearekin batera, familien intimitatea errespetatzeko eskatu du Oiartzungo Udalak ohar baten bidez.