Tanzaniako istripu tragikoak Areetako familia bat kolpatu du

Joan den igandean Ngorongoroko (Tanzania) parke naturalean izandako istripu tragikoak Areetako (Getxo, Bizkaia) familia bat kolpatu du.

Hildakoak Elena Renteria (ama), izatez mundakarra eta Bilboko epaitegietako langilea, eta Ines Lomas (alaba) dira; zaurituak, berriz, Iñigo eta Ignacio Lomas, aita eta semea, hurrenez hurren.

Iñigo Lomasek, Acciona enpresako abokatuak, hainbat haustura ditu, baina arriskutik kanpo dago. Ignacio 15 urteko semeak lesioak ditu bularrean, saihets-hezurrak hautsita, eta litekeena da birikak zulatuta izatea; beraz, bere pronostikoa larria da. Biak Nairobiko (Kenya) ospitale batera eraman dituzte.

Hain zuzen ere, aitaren lankide guztiak (Acciona Bizkaia) buru-belarri ari dira lanean familiari laguntzeko, eta aseguruekin elkarlanean ari dira gorpuak aberriratzeko prozesua azkartzen saiatzeko. Gainera, aitaren lankide batzuek oporrak eten dituzte ezbeharraren berri izan bezain laster, EITBk jakin ahal izan duenez.

Bi adingabeak Ikastetxe Frantsesean ikasten ari dira, Zamudioko (Bizkaia) zentro pribatu batean. Ines Lomasek 17 urte zituen, eskolan ikasturte hau amaitu eta unibertsitatera joatekoa zen. Bi gazteak belar-hockeyan jokatzen ari ziren: mutikoa ikastetxe berean, eta Stick Getxo Hockey Klubean hildako gaztea.