Ostatu-eskaintzak gora egin du, batez ere etxebizitza turistikoetan

Turisten kopurua hazi den bezala, etxebizitza turistikoetako eta ostatuetako plazen kopuruak ere gora egin du azken hilabeteetan EAEn eta Nafarroan.

Gorakada handiena etxebizitza turistikoetan eskaintzen diren plazetan gertatu da. Espainiako Estatistika Institutuak otsailean jasotako datuen arabera, EAEn 21.504 plaza eskaintzen dira egunero, 2023an baino % 18 gehiago. Nafarroan igoera handiagoa izan da, % 28koa, eta 7.595 plaza eskaintzen dira.

Hotelak, ostatuak eta pentsioak

Hego Euskal Herrian guztira 878 hotel, ostatu eta pentsio ditugu, eta 48.000 plaza baino gehiago eskaintzen dira egunero.

Hain zuzen ere, Euskal Autonomia Erkidegoa da Estatuan hotel-plazen eskaintza gehien handitu den lurraldea, pandemiaren aurretik eskaintzen zena baino % 17,2 gehiago eskaintzen baititu gaur egun.

Nafarroan, aldiz, hotelen sektoreak atzera egin du, eta, gaur egun, pandemiaren aurretik zeudenak baino establezimendu eta plaza gutxiago daude.

 

Izan ere, Araban, Bizkaian eta Gipuzkoan, bidaiarien % 75ek hoteletan ostatu hartzea aukeratzen dute; apartamentu, kanpin edota landa-turismoak baino gehiago hautatzen dira beraz.

Nafarroan, ordea, gaualdiak modu orekatuagoan banatzen dira ostatu mota ezberdinen artean, eta Donejakue bideko aterpetxeek duten pisua garrantzitsua da.

Ostatu horien guztien prezioek plazen eskaintzaren bide bera egin dute: EAEn gora egin dute, eta Nafarroan, aldiz, behera. Une honetan, EAEko eguneko batez besteko tarifa Estatukoa baino % 10 garestiagoa da.

Alabaina, Estatuko lurraldeekin alderatuta, gure lurraldeetan igo dira gutxien prezioak turismo eta ostalaritza sektorean: % 5,3 EAEn eta % 5,2 Nafarroan. Balear Uharteak eta Errioxa bakarrik daude horren azpitik.