Loiun atxikitako gazte sahararra aske geratu da goizaldean

Ekainaren 23tik Loiuko aireportuan sarrera eskakizunak ez betetzeagatik atxikita zegoen gazte sahararra aske geratu da gaur goizaldean, Bilboko Guardiako Epaitegiaren aginduz, Xabier Legarreta Migrazio eta Asilo zuzendariak jakitera eman duenez.

Libre geratu dela baieztatu du Nayua Jatri Aduh arrazismoaren aurkako Bizkaiko mugimenduko ekintzaileak, eta jada lagun baten etxean dagoela gehitu du.

Orain, sarrera eskuratzeko prozesua jarri du abian ekintzaile sahararrak, Nayua Jatri Aduhren esanetan.

Sira Abed Rego Gaztedia eta Haurtzaro ministroak ohar baten bidez zabaldu duenez, arrazoi humanitarioak argudiatuta egin dute sarrera eskaera, eta Ministerioak onartu egin du.

Atzo kanporatu behar zuten gaztea Marokora zihoan hegazkin batean, baina komandanteak hegazkinera igotzea galarazi zion, segurtasun arrazoiak argudiatuta, eta Espainiako Poliziak adierazi zuen igandean deportatuko zutela, beste hegazkin batean.

Loiuko aireportuko ez onartuen eremuan zegoen, Espainiako Poliziaren zaintzapean, Espainiako Gobernuak asilo eskaera ukatu ostean.

Marokon kartzelan sartuko duten beldur da, jazarritako ekintzaile politikoa dela ziurtatu baitu. 

Zehar-Errefuxiatuekin gobernuz kanpoko erakundeak babestu egiten du ekintzaile sahararraren abokatuek Espainiako Gobernuaren Bizkaiko Ordezkariordetzaren aurrean aurkeztu duten eskaera, gaztea deportatzea saihesteko.