Gizartea -
Asilo eskatzailea
Gizon sahararra arratsaldean deportatuko dute Marokora, 13 egun Bilboko Aireportuan egon eta gero
Asteazkenetik gose greban dagoen gaztea ospitalera eraman dute ostiral goizaldean, ondoezak jota, baina probak egin ondoren Bilboko Aireportura eraman dute. Ezustekorik ezean, arratsaldean deportatuko dute Marokora.
EITB Media
Sorpresarik ezean, ekainaren 23tik Bilboko Aireportuko ez onartuen eremuan dagoen 20 urteko gizon sahararra arratsaldean deportatuko dute Marokora.
Radio Euskadin egin dioten elkarrizketan Javier Galparsoro Zehar Errefuxiatuekin gobernuz kanpoko erakundeko presidenteak adierazi duenez, asteazkenetik gose greban dagoen gizona ospitalera eraman dute ostiral goizaldean, ondoezak jota.
Polizia Nazionalak EITB Mediari adierazi dio ospitalera eraman dutela osasun probak egin ziezazkioten, baina ez dutela inongo momentuan ospitaleratu. Iturri horren arabera, atzo 23:20 aldera ospitale batera eraman zuten, baina "ezer larririk ez" zuela egiaztatu ondoren, Bilboko Aireportuko ez onartuen eremura eraman dute berriro, 02:00etan.
Atzo Auzitegi Nazionalak errefusatu egin zuen kautelazko neurriak hartzea, gazte sahararrak asiloa ukatzearen aurka jarri zuen errekurtsoaren aurrean. Hori dela eta, asilo eskatzailea arratsaldean deportatuko dute, Bilboko Aireportutik Tangerrera 15:00etan aterako den hegaldian.
Marokon kartzelan sartuko ote duten beldur da, jazarritako ekintzaile politikoa dela ziurtatu baitu.
San Juan bezperan iritsi zen saharar ekintzailea Bilboko Aireportura, eta geroztik ez onartuen eremuan izan dute, Espainiako Gobernuak ez baitzuen onartu hark egindako asilo eskaera.
