Gizartea -

Indarkeria matxista

Hiru gizon atxilotu dituzte Kanboko emakume bati taldeko sexu erasoa egitea egotzita

Emakumea gela batean giltzapeturik utzi zuten eta, arma batekin mehatxu eginez, taldean eraso zioten. Lo hartu zutenean egin zuen ihes biktimak.

I. G. | EITB MEDIA

Whatsapp Facebook Twitter Telegram Email

Kanboko (Lapurdi) emakume batek larunbat gauean hiru gizonek taldean sexu erasoa egin ziotela salatu du, arma baten mehatxupean. Astelehen honetan atxilotu dituzte hirurak eta Akizeko (Landak) polizia-etxean daude, sexu erasoa egotzita.

France Bleu irratiak zehaztu duenez, biktimak harremanetarako aplikazio baten bidez ezagutu zuen erasotzaileetako bat. Harekin elkartzean beste bi gizonak ere bertaratu ziren eta batera igaro zuten gaua.

Ondoren, emakumea gela batean giltzapeturik utzi zuten eta, arma batekin mehatxu eginez, taldean bortxatu zuten. Lo hartu zutenean egin zuen ihes biktimak.

Jarraian, biktimak salaketa jarri du eta poliziak hiru erasotzaileak atxilotu ditu.

Gaur, asteartearekin, elkarretaratzea egingo dute erasoa salatzeko (19:00etan).

Tratu txarrak pairatzen badituzu edo kasuren bat ezagutzen baduzu, kontuan hartu gida honetako aholkuak eta/edo deitu doako telefono hauetara: 900 840 111 (EAEkoa), 016 (Espainiako Estatukoa) edo 3919 (Iparraldekoa, eguneko 24 orduetan erabilgarri, igande eta jaiegunetan 09:00etatik 18:00etara izan ezik). Ez dute fakturan arrastorik uzten, baina bai telefonoan. Beraz, ez ahaztu ezabatzea.

Hau zure interesekoa bada, baliteke beste gai hauek ere izatea
Tratu txarrak gaur Iparraldea Gizartea bideoak Indarkeria matxista Eguneko albisteak Eguneko albisteak Matxismoa Eraso sexualak gaur Lapurdiko berriak