Sei atxilotu Donostian emakume bati sexu-erasoa egitea leporatuta

Donostiako Udaltzaingoak sei pertsona atxilotu ditu azken orduetan, emakume bati sexu-erasoa egin diotelakoan. Lapurreta eta bere borondatearen kontra atxikitzea ere leporatu diete. 

Salaketa ostegunean jarri zuen emakumeak, eta sei atxilotuak epailearen esku jarri dituzte jada. Ikerketak irekita jarraitzen du, erasoaren nondik norakoak argitu eta atxilotuen inplikazioa argitzeko. 

Emakumeak jarritako salaketaren aurrean, Udalak ohar instituzionala kaleratu du, emakumeak jasandako sexu-erasoa "erabateko irmotasunez gaitzesteko". 

Udalak "babesa eta elkartasuna" adierazi dio "eraso tamalgarri honen biktimari, bai eta bere familia eta hurbileko ingurukoei ere", eta "indarkeria-egoerak pairatzen dituzten edo pairatu dituzten emakume guztiei" jakinarazi die "laguntza behar eta nahi izanez gero Udalak dituen zerbitzu eta baliabideetara jo dezaketela".

Oharraren arabera, "mota honetako erasoak gure gizartean oraindik nagusi diren indarkeria matxistaren eta genero desberdintasuneko jarreren adierazpenik higuingarrienak dira eta Udalak guztiz gaitzesten ditu. Ezinbestekoa da lanean jarraitzea, gizartea eta hiriko giza eragileekin batera, balioetan oinarritutako heziketaren eta gizon eta emakumeen arteko berdintasunaren alde".

Udalaren adierazpen instituzionalean gaineratu dutenez, "beharrezkoa da, halaber, azpimarratzea horrelako jarrerak eragiten dituzten faktoreetan egunez egun esku hartzen jarraitu behar dela".

Udalak gaitzespena adierazteko elkarretaratzea deitu du. Larunbatean, otsailak 17, egingo dute, 12:00etan, Alderdi Ederren.