Herritarren laguntza eskatu dute Madrilgo Alcala-Meco espetxetik ihes egindako sikario bat aurkitzeko

Espainiako Poliziak herritarren laguntza eskatu du 20 urteko Yousef Mohamed Lehrech El Pastilla sikarioa aurkitzeko. Joan den larunbatean Madrilgo Alcala-Meco espetxetik ihes egin zuen senideekin bildu ostean.

Yousef Mohamed Lehrech behin-behineko espetxealdian zegoen bi hilketengatik, eta FIES (jarraipen bereziko presoen fitxategia) bezala kalifikatua izan zen, hau da, arriskutsuenen eta kontrol handiagoa behar dutenen artean.

Presondegietako funtzionarioek salatu dute Yusef M.L.k ez lukeela Alcala-Mecon egon behar, espetxe horrek ez baititu horrelako preso arriskutsuak hartzeko baldintzak betetzen, eta, beraz, "zentro-ereduetako" batean egon beharko luke, Estremerakoan, adibidez.

Faro de Ceuta egunkariak ihesaren berri eman zuen, eta hedabideak astearte honetan argitaratu duenez, El Pastilla abenduan bertan eraman zuten Algecirasko (Cadiz) espetxetik Alcala-Mecoko kartzelara, aurkako preso taldeekin zituen "bateraezintasunengatik".

Larunbatean, presoak hartu-emana izan zuen bere senideekin mintzalekuan, bisita ugariko egun batean, Gabonetako egunak zirela eta.

Antza denez, iturrien arabera, El Pastilla mintzalekutik atera zen bere modulura joateko, baina aprobetxatu zuen atzetik funtzionariorik ez zuela, bisita amaitzean, NANa jasotzen ari ziren senide ugarien irteera haiekin nahastu eta kanpora irteteko. Espetxeetako sindikatuek funtzionarioen eskasiari egotzi diote zaintzarik eza.

Azpimarratu dutenez, Alcala-Mecoko espetxean, protokolo "zaharkitu" samarrak dituena, egiten diren bisitak NANarekin kontrolatzen dira oraindik, ez hatz-markekin. Gainera, iturrien arabera, funtzionarioak, edo oso helduak edo oso gazteak dira eskarmenturik gabeak.