Gizartea -
INDARKERIA MATXISTA
Protesta ekitaldia egingo du Lointek Gernikak gaur arratsaldean, gertatutako eraso sexualak gaitzesteko
Taldeak arratsaldeko 20:00etan partida izango du Gernikan, eta zuzendaritzak protesta ekitaldia deitu du aurretik. Atzo, Lointekeko presidenteak barkamena eskatu zuen Euskal Telebistan. Gernika-Lumoko Udalak oharra kaleratu du eta irmoki gaitzetsi ditu salatutako gertaerak.
IKER GOMEZ | EITB MEDIA
Lointek Gernika saskibaloi taldeak protesta ekitaldi bat deitu du gaur arratsalderako, Mario Lopez entrenatzaile eta kirol kudeatzaile ohiak jokalari adingabe bati egindako sexu-erasoak gaitzesteko. Hala adierazi zuen bart Gerardo Candina klubeko presidenteak Euskal Telebistako mikrofonoen aurrean. Ekitaldi horren bitartez ere, biktimari elkartasuna adierazi nahi diote.
Lointek Gernikak udalerrian bertan partida izango du gaur arratsaldean, 20:00etan. Protesta, aurretik egingo dute. Horrez gain, kirol partidaren ondoren, Lointek Gernikaren zuzendaritzak prentsaurrekoa emango du barkamena eskatzeko eta protokoloak eta prozedurak hobetzeko asmoa berresteko, salatutako erasoak bezalakoak berriro gerta ez daitezen.
Saskibaloiko taldeak baieztatu du akusazio partikular gisa aurkeztuko dela Mario Lopezen aurka, Lointek Gernikako entrenatzaile izandakoak adingabe bati egindako sexu-erasoak ikertzen dituen kasuan.
Erasoak 2022ko ekainean salatu zituen 33 urteko emakume batek, eta 1998an hasi ziren, biktimak 13 urte zituenean eta Lopezek Allende Salazar ikastetxe publikoko lantaldean entrenatzen zuenean. Erasoak hiru urtez luzatu ziren, biak Lointek Gernikako kide zirenean.
Candinak, ETBri egindako adierazpenetan, ukatu egin zuen atzo klubak salaketaren edukia ezagutzen zuenik, eta Kirol Batzordeak jazarpenagatiko salaketa baten berri baino ez zuela gaineratu zuen.
Gernika-Lumoko udal gobernuaren "gaitzespen irmoa"
Asteburuan albistea hedabideetan argitaratu geroztik isiltasunari eutsi ostean, ustez Lointek taldeko entrenatzaile ohiak adingabe bati hiru urtez egindako sexu erasoak irmoki gaitzetsi ditu Gernika-Lumoko Udalak.
Ohar batean, udal gobernuak elkartasuna eta babesa helarazi dizkio biktimari eta, oro har, Gernikan edozein motatako erasoak eta bereziki sexu erasoak jasan dituen orori.
Gernikan horrelako gertaerek lekurik ez dutela adierazi ostean, eraso horiek desagerrarazteko egunez egun lan egingo dutela nabarmendu du.
