Gizon bat atxilotu dute Gasteizen, haur pornografia edukitzea eta partekatzea egotzita

Espainiako Poliziak 30 urteko gizon bat atxilotu zuen pasa den urrian Gasteizen, adingabeak galbideratzea leporatuta, haur pornografia izan eta Internetez partekatu duelakoan. Atxilotuak aurrekariak ditu gisa horretako delituengatik.

Polizia Nazionalak gaur goizean ohar baten bidez jakinarazi duenez, urte hasieran abiatu zuen ikerketa AEBko gobernuz kanpoko erakunde batek egindako salaketaren ondotik. Zehazki, NCMEC izeneko irabazi asmorik gabeko erakundeak salatu zuen Espainiatik pertsona bat eduki pedofiloak sarera igotzen ari zela bilaketa atari ezagun baten zerbitzuak erabiliz. 

Ikertzaileek egiaztatu zuten interneterako konexioak Arabako hiriburutik egiten zirela, eta azkenean erabiltzailea identifikatzea eta bere helbidea zehaztea lortu zuten.

Iragan urrian, agenteek bi etxebizitza miatu eta haur pornografia zuten hainbat gailu elektroniko atzeman zituzten. Hori guztia dela eta, 30 urteko gizonezkoa atxilotu zuten.