Hermosori egindako presioak berretsi dituzte Alexia Putellasek, Irene Paredesek eta Misa Rodriguezek

Alexia Putellas, Irene Paredes eta Misa Rodriguez Espainiako selekzioko jokalariek berretsi egin dute astelehen honetan Jenni Hermosok Luis Rubiales Espainiako Futbol Federazioko (RFEF) presidentearen eta ingurukoen aldetik jasan dituen presioak, Munduko Txapelketako finalaren ostean eman zion musua publikoki justifika zezan.

Hiru futbol jokalariek lekuko gisa deklaratu dute gaur goizean Auzitegi Nazionalean, Rubiales auzia tarteko; izan ere, Espainiako Futbol Federazioko presidente ohia ikerketapen dago Hermosori sexu-erasoa egitea eta horren aurkako bortxaketa delituak egotzita. Hala, Fiskaltzak Rubialesen aurkako kereilan salatu zituen gertakariak berretsi dituzte.

Espainiako selekzioko jokalariek ez dituzte erantzun komunikabideen galderak: "Sentitzen dut, ezin dugu", adierazi du Alexia Putellasek Auzitegi Nazionalera sartzerakoan.

Hiru jokalarien ondotik, urrian zehar deklarazio sorta batekin jarraituko du ikerketak. Hala, urriaren 10ean Jorge Vilda emakumezkoen taldeko hautatzaile ohiaren eta Ruben Rivera RFEFko Marketing zuzendariaren txanda izango da, eta hilaren 16an, berriz, Albert Luque selekzioko zuzendariarena.

Ondoren, urriaren 20tik 27ra bitartean, sei lekukok hartuko dute hitza, besteak beste, Luis de la Fuente futbol hautatzaileak, Pablo Garcia-Cuervo RFEFeko Komunikazio zuzendari ohiak eta Jose Maria Timon Rubialesen kabineteko zuzendariak.