Gizartea -
Emakumeen aurkako indarkeria
Gizon bat atxilotu dute sexu-erasoa egotzita Iruñean, kalean emakume bat indarrez musukatzeagatik
26 urteko gizonezkoak emakumea gerritik heldu zuen, eta biktima ihes egiten saiatu zen arren, gizonak ahoan musu ematea lortu zuen. Emakumeak salaketa jarri zuen Udaltzaingoaren aurrean.
eitb media
Gizon bat atxilotu dute Iruñean sexu-erasoa leporatuta emakume bati indarrez musu ematea egotzita, Nafarroako hiriburuko Udaltzaingoak jakitera eman duenez.
26 urteko gizonezkoa Mercaderes kalean barrena zihoan koadrilarekin batera, eta emakume koadrila batekin gurutzatu zen. Gizona emakumeengana hurbildu zen, eta haiek bakean uzteko eskatu zioten. Baina gizonak emakumeetako bat gerritik heldu zuen eta musu eman zion, emakumea ihes egiten saiatu zen arren, biktimak Udaltzaingoaren aurrean salatu zuenez.
Agenteak zebiltzan erasoa gertatu zen inguruan, eta emakumeak haiengana jo zuen eta salaketa jarri zuen. Ondoren, gizona atxilotu zuten eta jada epailearen esku dago.