Gizartea -
A30, GREBA FEMINISTA
Zaintza sektoreko langileen grebarako eskubidea aldarrikatu du Mugimendu Feministak
Gasteizen egindako bilera batean, zaintza eta garbiketa lanetan diharduten langileak dituzten enpresei eta partikularrei greba eskubideaz "jabetzeko" eskatu diete, eta greba egiten duten langileak "ez zigortzeko".
EITB MEDIA
Zaintzarako eskubide kolektiboaren alde azaroaren 30erako greba deitu du Euskal Herriko Mugimendu Feministak eta greba horren harira, greba eskubidea errespetatzeko eta sektore horretan lan egiten duten langileek greba egiten badute "ez zigortzeko" eskatu diete enpresei eta partikularrei.
Kolektibo horretako ordezkariek bilera egin dute gaur Gasteizen. Bertan, "lan-baldintza duinak ez izateak langileen eskubideak ez ezik, zaintzaren beharra duten pertsonen eskubideak ere urratzen" dituela salatu dute eta ildo horretan, lan-baldintza duinak eskatu dituzte: "Enpresek gure lanari esker aberasteari uztea nahi dugu, bidezko hitzarmen bat izan nahi dugu, soldata ez ezik, gurekin lan egiten duten pertsonei eragiten dieten beste baldintza batzuk ere berrikusteko", adierazi dute.
Lan-baldintza "prekarioak eta lan esplotaziokoak" dituztela eta, argi dute zaintza sektoreko langile askok, bai egoitzetako langileek, bai Etxez Etxeko Arreta Zerbitzukoek, ezin izango dute greba egin. "Lankide horiei esan nahi diegu mugimendu feministatik ulertzen dugula haien egoera, eta horrek indar handiagoa ematen digula grebarekin bat egiteko eta euren aldarrikapenak gure egiteko" azaldu dute.
Amaitzeko, greba honekin "zainketen eraldaketaren hasiera" abiarazi nahi dutela esan dute.
