Albiste izango dira: Ikasturte hasiera haur-eskoletan, Hezkuntza Legea eta ETBren udazkeneko programazioa

Honako gai hauek hartuko dituzte gaur, irailak 6, hedabideetako lerroburu nagusiak:

- Ikasturte hasiera haur-eskoletan: Gaur hasiko dute ikasturte berria haur-eskoletan (0-3 urte), eta urte honetatik aurrera Haurreskolak Partzuergoko ikastetxe publiko guztiak doakoak izango dira. Behin betiko datuen arabera, matrikulazio berriak % 25 igo dira Haurreskolak Partzuergoan. 

- Hezkuntza Legea: Pello Otxandiano EH Bilduren Pograma zuzendariak Hezkuntza Legearen proiektuari EH Bilduk egingo dizkion zuzenketak azalduko ditu 12:00etan koalizioak Donostian duen egoitzan. Hezkuntza ituna Eusko Legebiltzarraren % 90ek babestu zuen (EAJ, EH Bildu, PSE-EE eta Elkarrekin Podemos-IU), baina Elkarrekin Podemos-IU ez dago ados Eusko Jaurlaritzak aurkeztu duen Hezkuntza Legearen proiektuarekin.

- ETBren udazkeneko programazioa: ETBk udazkeneko programazioa aurkeztuko du FesTVal jaialdian, 11:00etan. Unai Iparragirre ETBko zuzendariarekin batera, aurkezleak eta protagonistak izango dira Gasteizko Andre Maria Zuriaren plazan.