Taldeen Aurkezpen Ofiziala hartuko du Bilbok, Tourraren irteera handiaren aurretik

Bizkaia Aretoa Grand Départ Pays Basque 2023aren epizentro bihurtu da gaur goizean. Bingen Zupiria Eusko Jaurlaritzako Kultura eta Hizkuntza Politikako sailburu eta bozeramaileak, gaurtik hasita eta uztailaren 1, 2 eta 3an nazioarteko tropeleko txirrindulari onenak Euskadiko errepideetan lehen pedalkadak ematen hasi arte egingo diren jarduera ugari eta askotarikoen berri eman du.

Tour giroan murgilduz, hasiera handiaren aurreko astea ekitaldiz beteta dator.

Taldeen Aurkezpen ofiziala

Frantziako Tourreko Taldeen Aurkezpen Ofiziala izango da mugarri nagusietako bat, EITBk 200 herrialde ingurura zuzenean emango duen ekitaldia. Herritar guztiei zuzendutako ekitaldia ekainaren 29an egingo da, Abandoibarra etorbidean, Euskalduna Jauregiaren eta Guggenheim Bilbao Museoaren artean.

Aurkezpen ofiziala 18:30etik 20:00etara izango da, baina 17:00etatik aurrera hainbat jardueraz gozatzeko aukera izango da. Aurkezpen ofiziala amaitu ondoren, Tourra abiatu aurreko giroarekin gozatu ahal izango da 22:00ak arte.

Ekitaldiak Frantziako Tourrean gutxienez behin parte hartu duten euskal txirrindulari guztiak omentzeko balioko du. Pogacar, Vingegaard, Landa, Bilbao, Izagirre eta gainerakoak pedalei eragiten hasi baino lehen, euskal txirrindulari horiek bertaratuko diren zaleen txalo eta esker ona jasoko dute.

Arratsalde osoan zehar, giro ona eta musika izango dira nagusi Hortzmuga, Demode Quartet, ETS & Süne, Oreka TX, Kukai eta Neomak taldeen emanaldiekin, besteak beste.

Fan Park

Aurkezpenaren egunean bertan, goizean, Tourreko Fan Park zaleentzako gunea inauguratuko dute Areatzako parkearen inguruan, Bilbon. Gune irekia da, doakoa, eta, oro har, txirrindularitza giroan eta, bereziki, Tourrean murgiltzeko esperientziaz gozatu ahal izango da.

Babesleen standak animazioekin, opariak, tirolina erraldoi bat, bizikleten erakusketa eta bi gurpilen gainean ibiltzen ikasteko pistak egongo dira, besteak beste. Gainera, pantaila erraldoian, bai taldeen aurkezpena bai Tourraren lehen etapa jarraitu ahal izango dira zuzenean. Publikoak herri kirolen eta euskal dantzen erakustaldiak ere izango dituzte gozatzeko. Era berean, bisitariek hainbat food truck (Gure Poke, Café Iruña, Arrese, Abasotas, Thate...) izango dituzte gozagai, gune berezi batean.

Herritarren parte hartzea

Tourra iritsi aurreko astea Bilboko BIZITOURarekin hasiko da, Euskadi Txirrindularitza Fundazioak antolatuta, bizikleta familian eta lagunekin jai giroan bizitzeko jardunaldi ludikoarekin. Hitzordua ekainaren 25ean da, igandean, 12:00etan, Bilboko Areatzan.

Grand Départ Pays Basqueko ekitaldien egitarauaren barruan, txirrindularitza alorreko adituek eta zientzialariek azken ikerketa eta esperientzien berri emango dute munduko txirrindularitza lasterketa handienaren atarian egin ohi den 'Science & Cycling' mintzaldian. Aurten, Bilboko Bizkaia Aretoan egingo dituzte jardunaldiak, ekainaren 28an eta 29an, Kirol Eskolak eta EHUk sustatuta.

Kartelen erakusketa

Bilboko Arte Ederren Museoak 2023ko Tourraren irudia aukeratzeko lehiaketaren kartel finalisten erakusketa hartuko du.

Raisa Alava ilustratzaile arabarrak diseinatu du aurtengo lasterketaren irudia. Kartel ofiziala Bilboko Arte Ederren Museoan egongo da ikusgai, baina baita beste finalistenak ere. Erakusketa ekainaren 29an inauguratuko dute, eta Frantziako Tourrak euskal errepideak zeharkatzen dituen egunetan zehar bisitatu ahal izango da.