Gasteizko emakume haurdunaren ustezko hiltzailea atxilotu dute Zaragozan

Guardia Zibilak atxilotu egin du igande honetan Gasteizko apartahotel batean indarkeria zantzuekin hilda agertu den emakumearen ustezko hiltzailea. Ertzaintzak indarkeria matxistaren barruan kokatu du hilketa, eta, biktimarekin batera, haurtxo bat aurkitu dute egoera onean, baina ospitalera eraman dute, mediku-azterketa egin diezaioten. 

Urruntze-agindua zuen bikotekide ohia desagertuta egon da orain arte. Guardia Zibilak Zaragozan atxilotu du, antza denez, ibilgailu batean Valentziako Erkidegorako bidean ihes egiten ari zela.

Segurtasun Sailak ohar batean azaldu duenez biktimak 32 urte zituen eta Gasteizkoa zen. Ertzaintzak ikerketa zabalik du, hilketaren nondik norakoak argitzeko.

Emakumearen gorpua arabako hiriburuko Gasteiz etorbidean kokatuta dagoen Liberé taldearen aprartahotel batean topatu dute, indarkeria zantzuekin. 

Poliziaren ikerketa zabalik dagoenez, Liberé taldeko iturriek ez dute zehaztu zenbat denbora eman zezakeen emakumeak apartamentuan bizitzen, ezta bakarrik bizi ote zen ere, baina EFEri azaldu dionez Gasteizkoak egonaldi laburretako gelak dira. 

Erreakzioak

Bestalde, Gorka Urtaran Gasteizko alkateak bozeramaileen batzordea deitu du biharko, indarkeria matxistaren aurkako protokoloa abian jartzeko helburuz. Alkatearen asmoa da bozeramaileekin 11:00etan biltzea, eta gaztearen hilketa salatzeko elkarretaratzea 12:00etarako deitzea.

Emakume honena urteko bigarren hilketa matxista da Euskadin. Lehenengoa Lourdes del Hoyorena izan zen, bere bikotekide ohiak maiatzaren 16an Orion (Gipuzkoa) eskopeta batekin tiroz hil zuen, bere buruaz beste egiteko gero.