Gizartea -
Indarkeria matxista
Gizon bat atxilotu dute Bilbon, Sorian emakume bati sexu erasoa egiteagatik
Erasoa ikertzen ari ziren agenteei biktimak emandako datuei esker, martxoaren 23an erasotzailea atxilotu ahal izan zuten, Bizkaiko hiriburuan. Otxarkoaga auzoan bizi zenaren susmoa zuten, eta hantxe bertan hartu zuten atxilo.
AGENTZIAK | EITB MEDIA
Polizia Nazionalak Bilboko bizilagun bat atxilotu du Otxarkoaga auzoan, Sorian emakume bati sexu erasoa egitea egotzita. Atxilotuak aurrekariak ditu genero indarkeriagatik.
Poliziak berak gaur bertan jakitera eman duenez, komunean dituzten lagun batzuen etxera lagundu zion emakumeari erasotzaileak, eta orduan gertatu zen erasoa.
Biktimak laguntza eskatu zien Soriako kaleak zaintzen ari ziren agente batzuei. Gertatutakoaren berri jasotzearekin batera, protokoloa martxan jarri eta ospitalera eraman zuten emakumea. Gerora, biktimak salaketa jarri zuen.
Erasoa ikertzen ari ziren agenteei biktimak emandako datuei esker, martxoaren 23an atxilotu zuten erasotzailea, Bizkaiko hiriburuan. Otxarkoaga auzoan bizi zen susmoa zuten, eta hantxe bertan hartu zuten atxilo.
Atxilotua epailearen aurrera eraman zuten handik ordu batzuetara.