Gizartea -
Gertakaria
"Etorkizuneko belaunaldiei jakintza transmititzen dieten irakasleen minarekin" bat egin du Macronek
Frantziako presidentea atsekabetuta agertu da Donibane Lohizuneko (Lapurdi) lizeo bateko irakaslearen hilketagatik. "Nazioa zuen alboan dago", idatzi du Macronek Twitterren.
M. D. | EITB MEDIA
Emmanuel Macron Frantziako presidenteak Donibane Lohizuneko (Lapurdi) lizeo bateko irakaslearen hilketa deitoratu du.
"Familiaren, lankideen, ikasleen eta etorkizuneko belaunaldiei jakintza transmititzen dieten irakasleen mina sentitzen dut", idatzi du Macronek Twitterren.
"Nazioa zuen alboan dago", gaineratu du presidenteak.
Frantziako Gobernuak minutu bateko isilunea deitu du biharko, osteguna, 15:00etan, Donibane Lohizuneko (Lapurdi) lizeo pribatu batean hildako irakaslearen omenez. Pap Ndiaye Hezkuntza eta Stanislas Guerini Funtzio Publikoko ministroak ikastetxera bertaratu dira.
16 urteko ikasleak, ustezko hiltzaileak, ez dauka aurrekaririk. Hilketagatik inputatu dute, Jerome Bourrier Baionako fiskalak baieztatu duenez.
