Gizartea -
ARABA
Urtaranek diskoteketako segurtasun-langileentzako baliabideak eskatu ditu, erasoak saihesteko
Gasteizko alkateak igande goizaldean Gasteizko diskoteka batean izandako gertakaria izan du hizpide. Bertan, lau pertsona zauritu zituen arma zuriz gazte batek, bat larri. Ertzaintzak atxilotu egin zuen erasotzailea.
eitb media
Gorka Urtaran Gasteizko alkate eta Eudeleko presidenteak publikoki eskatu du arma zuriak daramatzatenei zigorra gogortzeko eta diskoteketako segurtasun-langileei baliabideak emateko, erasoak saiheste aldera. Igande goizaldean Arabako hiriburuko diskoteka batean izandako gertakariaren ondotik egin ditu adierazpenok. Gizon bat oso larri zauritu zen arma zuriz, borroka batean.
Miñaoko Parke Teknologikoan izan da astelehen honetan Urtaran, eta erasoa "irmo" gaitzesten duela berretsi du, eta "azkar eta lehenbailehen senda daitezela" opa die biktima guztiei.
Alkatearen arabera, gertatutakoa ez da kasu isolatua izan, azken boladan Euskadin eta Estatu osoan horrelako erasoak maizegi gertatzen ari baitira. Horregatik, diskoteketako segurtasun-langileek sarreran metal detektagailuak erabili ahal izateko Madrilgo aisialdiaren sektorean planteatu ziren neurrien antzekoak aztertzeko eskatu du.
Halaber, "gauean labana bat eramateagatik zigorrak gogortzea" eskatu du. Horrela, alkatearen ustez, ohitura hori duenak bi aldiz pentsatuko baitu. Urtaranek gaineratu du garaia dela gaiari buruz "hausnartzeko", eta, ildo horretan, Euskadiko Udalen Elkartearen batzorde betearazleak gai hori aste honetako bileran azter dezakeela aurreratu du.
