Urpekari baten gorpua uretatik atera dute Elantxoben

Larrialdi zerbitzuek 58 urteko urpekari baten gorpua atera dute igande honetan itsasotik, Elantxoben (Bizkaia).

Segurtasun Sailetik jakitera eman dutenez, gorpua goizeko hamarrak aldera berreskuratu dute, herritar batek larrialdi zerbitzuei deitu dienean, herriko portutik uretan gorpu bat ikusi duela esanez.

Suhiltzaileak eta Ertzaintza, besteak beste, bertaratu dira, eta pertsonaren heriotza egiaztatu dute.

Ertzaintzak jakinarazi duenez, lau pertsonako bi talde urpeko arrantza praktikatzera atera dira gaur goizean, eta horietako bat izan da hildakoa. Gainerakoak euren kabuz atera dira abisua jaso ostean, eta ez dituzte erreskatatu behar izan.

Ertzaintzak ikerketa abiatu du gertakariaren nondik norakoak argitzeko.