Baso-soiltzeak Islandiaren tamainari dagokion azalera suntsitzen du urtean

Urtero 10 milioi hektarea baso inguru suntsitzen dira, hau da, Portugalen tamaina baino handiagoa den azalera eta Islandiakoaren baliokidea, NBEren arabera. Munduko baso-soiltze "kezkagarri" hori, nekazaritzarekin eta lurraren erabileran izandako beste aldaketa batzuekin batera, berotegi-efektuko gasen munduko isuriren % 25aren arduraduna da.

ONU-REDD Programaren azken txostenaren, Nazio Batuen Ingurumen Programaren Kontserbazioa Zaintzeko Munduko Zentroaren (PNUMA-CMVC) eta Green Gigaton Challenge ekimenaren (GGC, "gigatona berdearen erronka") arabera, mundua ez dago baso-soiltzea amaitu eta lehengoratzeko 2030erako helburuak lortzeko bidean. Izan ere, xede hori funtsezkoa da 1,5 graduko Parisko Akordioaren helbururantz aurrerapausoak emateko.

Txostenean ondorioztatzen denez, 2030eko helburuak egingarriak izateko, mugarria lortu behar da, hau da, 2025erako beranduenez basoek isurien gigatona bat lehengoratzea.

Hain zuzen ere, Luiz Inacio Lula da Silva Brasilgo presidente berria boterera eraman zuen kanpainako leloetako bat izan zen klimaren defentsa orokorra eta, bereziki, Amazoniaren baso-soiltzea gelditzea. Horrela, Brasilgo presidente berriak goi-bilera bat deitu nahi du aurten bertan, Lurreko landare-birikarik handiena partekatzen duten hamaika herrialdeetako presidenteekin.

Jair Bolsonaro aurrekoak utzitako Amazoniaren baso-soiltzearen aurkako borroka-neurriak berrezartzea da Lularen konpromisoa. Bolsonaroren agintaldian baso-suntsiketa ia % 60 handitu zen, urtean batez beste 11.396 kilometro karratu suntsituta.

Baso-soiltzearen arrazoien artean baso-suteak daude, basoak eta biodibertsitatea suntsitzeaz gain, atmosferara CO2 kopuru handiak askatzen baitituzte.

Adibide gisa, 2022an 786.000 baso-hektarea erre ziren Europar Batasunean (EB), horietatik % 39 Espainian, eta 28 milioi tona CO2 askatu ziren atmosferara.

Egoera horren aurrean, NBEk uste du ezinezkoa izango dela batez besteko tenperatura globala soilik 1,5 gradu igotzea, baldin eta basoek ez badute zeregin garrantzitsua betetzen.