Gizartea -
KRISIA OSAKIDETZAN
Goia alkateak Donostialdeko ESIaren krisian eskuhar dezala eskatu du Elkarrekin Podemosek
Elkarrekin Donostiak premiazko interpelazioa aurkeztu du "alkateak Donostialdeko ESIaren krisi larria konpontzen laguntzeko Udalak hartuko dituen neurriak argitu ditzan".
AGENTZIAK | EITB MEDIA
Donostialdeko ESIaren krisia konpontzen laguntzeko zer egiteko prest dagoen azaltzeko eskatu dio Elkarrekin Donostiak Eneko Goia Donostiako alkateari, eta Osakidetzak hartutako erabakiak gaitzetsi dituzten osasun-profesionalekin bildu ez izana kritikatu du.
Komunikabideetara igorritako ohar batean azaldu duenez, Elkarrekin Donostiak premiazko interpelazioa aurkeztu du Eneko Goia alkateak Donostialdeko ESIaren krisi larria konpontzen laguntzeko Udalak hartuko dituen neurriak argitu ditzan. Izan ere, "ezinezkoa da hain gertaera larriek donostiarrek jasotzen dituzten osasun-zerbitzuetan eragin negatiborik ez izatea" dio oharrak.
Aitzole Araneta udal alderdiko bozeramaileak gogor kritikatu du krisia lehertu zenetik udal gobernuak bilerarik egin ez izana mobilizazioetan murgildu diren zerbitzuburuekin.
"Alkateak prentsan adierazi du kezkatuta dagoela Donostia Ospitaleak erreferente izateari utz diezaiokeelako, eta elkarrizketarako bideak irekitzearen alde dagoela. Zeintzuk dira, hiri honetako arduradun publiko gorena denez, bultzatu nahi dituen bide horiek? Hiri honetako zerbitzu medikoen kalitateari hain zuzenean eragiten dion egoera hau konpontzen saiatzeko hurbilketa motaren bat hasi al du?" galdetu du Aranetak.
Elkarrekin Donostiaren ustez, "krisi larri honi lehen mailako arretaren egoera larri kezkagarria gehitu behar zaio". Hala, egoera "jasanezina" dela salatu dute eta "neurri egokiak hartu behar direla aldarrikatu du.
