Barçako ultrek Iturramako taberna bati egindako erasoaren "inpunitatea" salatu dute Iruñeko bizilagunek

Ehunka lagunek manifestazioa egin dute ostiral iluntzean Iruñeko Iturrama auzoko kaleetan, asteartean, Osasunaren partidaren aurretik, Ezpala tabernan Bartzelonako ultrek egindako erasoa gaitzesteko eta tabernariei zein zauritutako bezeroei elkartasuna adierazteko.

"Ezpala Aurrera" eta "Ez, ez, ez, faxismorik ez" oihu artean igaro zituen manifestazioak Iturramako kale nagusiak, poliziak gertutik zainduta. Ezpala taberna atzeko plazan amaitu zen martxa. Jarraian, agiria irakurri dute, erasotzaileen "inpunitatea" salatuz. "Pentsaezina da burua estalita zeramaten 40 faxista iristea Iruñera, egun argiz, taberna bat txikitzea, eta ezer ere ez gertatzea".

"Ez da gertakari isolatu bat izan", deitoratu dute, taberna horretan "sarekada ugari izan direlako, ikaratzea besterik bilatzen ez duten polizia-zabalpenarekin". "Herri-mugimenduaren kontra, Polizia. Faxismoaren aurka, antolatutako auzoa", gaineratu dute. "Faxistek ez dute lekurik auzo honetan eta, horrelako erasoen aurrean, irmo erantzungo dugu", ohartarazi dute.