Epaitegiak urruntze agindua onartu die Basurtuko Ospitalean bahitutako jaioberriaren gurasoei

Basurtuko Ospitalean bahitutako jaioberriaren familiak eskatutako urruntze agindua onartu du Bilboko 9. zenbakiko Instrukzio Epaitegiak, iturri juridikoek jakinarazi dutenez.

Agindu horren arabera, 24 urteko emakumea ezingo da familiarengandik 500 metro baino gutxiagora egon, eta debekatuta du eurekin harremanetan jartzea. Bahitzailearen abokatuak ez du eskaeraren kontra egin.

Atzotik, berak eskatuta, Basurtuko Ospitaleko Psikiatria Unitatean dago ingresatuta bahitzailea. Aimar jaioberria bahitu eta biharamunean atxilotu zuten emakumea. Larunbatean, behin-behinean aske utzi zuen guardiako epaileak.

Epailearen aurrean egindako deklarazioan, egindakoa aitortu zuen andreak, eta ospitale psikiatriko batean sartzea eskatu zuen. Auzitegiko medikuek ez zuten, ordea, beharrezko ikusi. Hori baztertuta, bere borondatez ospitaleratuko zela jakinarazi zuen defentsa abokatuak.