Gizartea -
Sexu-erasoa
Sexu eraso bat salatu du Iruñeko Bideko Ama Birjina Ospitaleko langile batek
Biktimak adierazi duenez, lan txanda amaitzean, etxera joatera zihoala, sexu eraso bat jasan zuen irailaren 2an ospitalearen barruan. Foruzaingoak 42 urteko gizon bat atxilotu du.
N. B. | EITB MEDIA
Foruzaingoak 42 urteko gizon bat atxilotu du Nafarroako Unibertsitate Ospitalean langile batek salatutako sexu erasoaren egilea delakoan, Nafarroako Foruzaingoak prentsa ohar baten bidez jakinarazi duenez.
Gertakariak irailaren 2an izan ziren, emakumea, Arcasako langilea, ospitaleko kafetegi zerbitzuaren enpresa emakidaduna, lan txanda amaitu eta etxera abiatu zenean.
Aipatu iturrien arabera, gertakariak salatu bezain laster, Foruzaingoak sexu erasoen biktimei laguntzeko prozedura aktibatu zuen, biktimari laguntza psikologikoa eta juridikoa emateko eta gertakarien egilea identifikatzeko ikerketa hasi zuen.
Agenteek egindako ikerketen ondorioz, joan den asteazkenean, 42 urteko gizonezko bat atxilotu zuten sexu erasoaren ustezko egilea zelakoan, eta epailearen esku utzi zuten. Guardiako epaitegiak behin-behinean aske uztea agindu zuen, eta urruntze agindua ezarri zion.
Arcasako Zuzendaritzak eta Langile Batzordeak, Ospitaleko Zuzendaritza eta Langile Batzordearekin batera, sexu erasoa gaitzesteko elkarretaratze isila egin dute gaur, ostirala, Iruñeko Vianako Printzea Kontsulta Zentroko zabalgunean.