Iruñeko Udalak 12.000 euroko isuna jarri die 10 laguni Curia kalean izandako istiluak tarteko

Iruñeko Udalak 10 salaketa jarri ditu administrazioaren bidetik, 12.000 euroko isun ekonomikoekin, joan den uztailaren 7an Curia kalean izandako istiluengatik; izan ere, San Fermin prozesioan, Udalbatza babesten ari ziren Iruñeko hiru udaltzain zauritu zituzten.

Istiluen ondotik, zortzi pertsona atxilotu zituzten, horien artean 40 urteko gizon bat, ustez, ukabilkada batez agente bati sudurra hautsi ziona. Azken hori espetxeratu egin zuten eta, ondoren, fidantzapean aske utzi zuten.

Udalak ohar bidez jakitera eman duenez, salaketa horiekin 10 pertsona zigortu dituzte "San Ferminetako prozesioan zehar herritarren segurtasuna arriskuan jartzea, prozesioan parte hartzen zuten hainbati jazarpena eginez", edaria botaz eta "tentsio eta indarkeria uneak sortuz".

Ebazpenak dio Curia kalean uztailaren 7an gertatutakoa arau-hauste larria izan daitekeela: "Indarkeriaz, mehatxuz edo larderiaz gertatu ziren, eta herritarren segurtasunerako sortutako arriskuaren garrantzia eta herritarren segurtasuna mantentzeko eta berrezartzeko kaltearen garrantzia kontuan hartuta, proposatzen den zehapenaren zenbatekoa 12 000 eurokoa da", ebatzi dute.

Administrazio-bide horrekin batera, bide judizialak irekita jarraitzen du. San Fermin egunean Curia kalean gertatutakoa epaitzeko prozeduran Iruñeko Udalak adierazi du akusazio partikular gisa aurkeztuko dela kaltetu gisa.