Miarritzeko, Bidarteko eta Angeluko hondartzak ireki dituzte, kutsaduraren ondorioz itxita egon ondoren

Iparraldeko 34 hondartza itxi zituzten atzo, osteguna, asteazken gauetik aurrera izandako euriteek eragindako kutsadura dela eta. Hala ere, ostiral honetako goizean horietako batzuk ireki dituzte uraren egoerak hobera egin ondoren; Miarritzekoa, Bidartekoa eta Angelukoa, hain zuzen ere. Hegoaldeko hondartzek itxita jarraitzen dute Hendaiatik Donibane Lohizunera arte.

Pirinio Atlantikoetako Prefekturak, horrezkero, bandera morea jaso, eta bainatzea galarazi zuen atzo. 

Antza denez, euri jasek uren tratamendurako zenbait plantek gainezka egitea eragin dute eta, halaber, oso gune lehorretan eroritako euri kantitate handiek ura kutsarazi dute, Sud Ouest egunkariak web gunean zabaldu duenez.

Egunaren zehar uraren analisi berriak egitea espero da, eta horren arabera erabakiko dute itxita mantenduko ote dituzten hegoaldeko hondartza horiek.