Gizartea -
Mugikortasuna
Autobus elektriko batek Illunbeko aparkalekua eta Donostiako erdialdea lotuko ditu
Etorkizunean zerbitzuak doakoa izateari utziko dio. Horrela, aparkalekuak tarifa murriztua izango du, autobus elektrikoaren bidaia-txartela barne. Autobusak egun osoa emango du martxan, printzipioz, Aste Santuan, Eguberrietan eta udan.
Agentziak | EITB Media
Autobus elektriko batek Illunbeko aparkalekua eta Donostiako erdialdea lotuko ditu. Zerbitzua aurten sendotu da; izan ere, erabilera bikoiztu du 2020 urtearekin alderatuta. Ibilgailu elektrikoa Europar Batasuneko Next funtsekin finantzatu dute.
Javier Hurtado Turismo sailburuak eta Cristian Lage Donostiako Turismo Jasangarrirako zinegotziak ekimena aurkeztu dute, Euskadiko Jasangarritasun Turistiko Planaren baitan.
Iragan udan zerbitzua eskaintzea ezinezkoa izan zen, Illunbe covid-19aren aurkako txertaketa zentro bilakatu zelako. 2020ko udan, ostera, martxan egon zen, pandemia urtearen udako "oasi" txikia aprobetxatuz, Lagek gogorarazi duenez. Donostiara "bisitari asko" heldu ziren, horietako asko autoan, beste garraiobide batzuetan indarrean zeuden murrizketen ondorioz, erantsi du.
Aurtengo udak erabiltzaile kopurua bikoiztu du, 2020 urtearekin alderatuta. Egun batzuetan 1.000 bidaiari baino gehiago izan dira. Hala ere, Lagek ohartarazi du etorkizunean zerbitzuak doakoa izateari utziko diola; izan ere, pandemiaren ostean merkataritza eta ostalaritza laguntzeko neurri bezala dute orain.
Lagek aurreratu duenez, aparkalekuak tarifa murriztua izango du, autobus elektrikoaren bidaia-txartela barne. Autobusak egun osoa emango du martxan, printzipioz, Aste Santuan, Eguberrietan eta udan.