Gizartea -
Araba
Zanbranako landa-eremu batean piztutako sutea kontrolpean hartzeko lanetan ari dira suhiltzaileak
Sugarren intentsitatearen ondorioz, A-3126 errepidea itxi behar izan dute Ozio eta Berganzo artean. Ibilgailu batetik botatako zigarro punta bat izan daiteke suaren jatorria.
agentziak | EITB MEDIA
Suhiltzaileak lanean ari dira gaur igande arratsaldean Santa Cruz del Fierro eta Txulato mendien artean (Zanbrana, Araba) landa-eremu batean piztutako sutea itzaltzeko.
Sutearen tamaina ikusita, baliabideak eskatu dizkiete Errioxari, Miranda Ebrori eta Nafarroari, helikopteroak eta hegazkinak bidali baitituzte sutea ahalik eta lasterren itzaltzeko.
Eusko Jaurlaritzako Segurtasun Sailak jakinarazi duenez, sua 16:30ak aldera piztu da zereal-zelaien gune batean. Lehen hipotesien arabera, ibilgailu batetik botatako zigarro punta bat izan daiteke suaren jatorria.
Sugarren intentsitatearen ondorioz, A-3126 errepidea itxi behar izan dute, Ocio eta Berganzo artean, 31. kilometroaren parean.