Gizartea -
GERTAKARIA
Onik erreskatatu dute Arrasateko espeleologo gazte bat Sobako La Gandara kobazulotik, Kantabrian
27 urteko gaztea ibilbide bat egiten ari zen sei lagunekin, kobazulotik irteteko lau ordu falta zituztela, indarrik gabe geratu denean. 03:50 aldera kobazulotik atera eta abisua eman dute hiru lagunek eta 09:00ak pasatxo zirenean atera dituzte guztiak.
AGENTZIAK | EITB MEDIA
Kantabriako larrialdi zerbitzuek onik erreskatatu dute gaur goizean 27 urteko euskal espeleologo bat, Sobako La Gandara kobazuloan egiten ari zen ibilbide batean indarrik gabe geratu ondoren. Arrasate, Gasteiz eta Nafarroako zazpi lagunek osatzen zuten taldea.
Kantabriako Gobernuak jakitera eman duenez, goizaldean erreskate dispositiboa aktibatu dute gazte bat kobazulo barruan aurrera egin ezinda zegoela jakin dutenean, irteeratik lau bat ordura.
Laguna ahiuta zegoela ikusita, taldeko hiru kidek barrutik atera eta abisua eman dute 03:50 aldera, 112 telefonoan.
Berehala bertaratu dira Kantabriako Gobernuko Espeleosocorro Zerbitzuko kideak eta Guardia Zibileko agenteak ura, janaria eta erreskate-materialarekin, gazteari eta lagunei ateratzen laguntzeko.
09:00ak pasatxo zirenean atera dira guztiak kobazulotik, egoera onean.
Gazteak ez du mediku laguntzarik behar izan.