Nafarroako Gobernuak suteak itzaltzeko laguntza eskatu dio Espainiako gobernuari

Zenbait sute piztu dira Nafarroan larunbat arratsaldean, eta egoeraren larritasuna dela eta, Nafarroako Gobernuak laguntza eskatu dio Espainiako Gobernuari. Aire bidezko baliabideak eta Larrialdietako Unitate Militarraren laguntza eskatu dizkio, Nafarroako suhiltzaile guztiak suteetan lanean ari baitira une honetan, kontrolik gabeko hiru puntutan.

Obanos, Legarda eta Muruzabal udalerrien inguruan piztu den baso-sute batek arrisku bizia eragin du inguru horretan. Gainera, Arguedasen ere beste sute bat piztu da eta Sendaviva hustu behar izan dute. Hori gutxi balitz, suhiltzaileak Olletan eta Leozen berpiztu den sutean ere lanean ari dira.

Baso-suteen arriskuagatik Larrialdietako Planaren 2. maila indarrean sartu da, eta Nafarroako Gobernua larrialdiko bilera egiten ari da une honetan.